Monday, September 21, 2015

சமகாலம்


*

ஏற்கனவே
நாம்
கலந்துரையாடியிருக்கிறோம்

காலம்
பெரும் வழியில் நிற்கும்
யாத்திரிகன் என்று

பிரபஞ்சத்தின் கோண்களை
காலத்தாலேயே
அளக்க முடியுமென்று

எண்ணங்களில்
மற்றும் கனவுகளில் மட்டும்
திரும்பி வருகின்ற எல்லையற்ற காலத்திற்கு காலடித் தடங்கள் உண்டென

நாம்
சாமர்த்தியமாக
ஒப்புக் கொண்டிருக்கிறோம்

காலம் சார்ந்த
அத்தனை இயல்பின்மைகளையும்

நிதர்சன உலகின்
நாகரீகம் சார்ந்த
அனைத்து உபாதைகளையும்

தற்காலிகம் என்பது
எந்தக் கால அளவில்
குறிப்பிட வேண்டும் என்பதை

நாம் கண்டிராத
காலத்தின் வேறு முகங்களை
இன்னொருவர்
கண்டதாகச் சொல்லும்போது

பிரிமுறுக்கம் கொள்கிறது
சுழிமுனை நாடியில்
ஏர்க்கனவே காத்திருக்கும்
ஈரமற்ற வேட்கை

நாம்
கலந்துரையாடுகிறோம்
சமகாலத்தைப்பற்றி

அது
எந்தக் காலத்திலும்
உடப்படாததென்று
*
கலாசுரன்

No comments:

Post a Comment