Monday, September 21, 2015

நான் அமர்ந்த புல்வெளிகள் எங்கே


*

ஆச்சரியங்கள் நிறைந்த
எனதிந்த சமகாலத்தை என்ன செய்வது

பழுக்கக் காய்ச்சிய
உலோகக் கம்பியொன்றை
குளிர்ந்த என் மனதின் மேல்
வைத்தே ஆகவேண்டுமா

ஓர் உன்னத இருளில்
என்னை உற்று நோக்கும் கண்கள்
அதீதமாய் பிரகாசிக்கின்றன

பேசும் மொழி
தனது உரையாடல்களை சபிக்கின்றன
நலம் உண்டாவதாக என்று

நானமர்ந்த புல் வெளிகள் எங்கே

இரு தினங்களில்
இந்த சமகாலம் முடிந்துவிடும்

ஒரே நேரத்தில் குளிர்ந்த மனதின் மேல்
இருவேறு சமகாலங்கள் அமர்கின்றன

நெடிய அபத்தங்களுக்குப் பின்
உலோக மணிகள் ஓலமிட்டன

அசரீரி ஒலிக்கிறது
சென்று வாருங்கள்
திருப்பலி நிறைவேறிற்று
*
கலாசுரன்

No comments:

Post a Comment