Friday, January 3, 2014

இரகசியம்

*
அன்றெனது மௌனத்தில்
பதுக்கிவைத்ததிந்த இரகசியம்

அதைப் பற்றி சொல்லும்போதே
அதன் பாதுகாப்பு உடைந்து உதிர்கிறது

அதென்னவென்று உங்களைப்போன்று
பலர் விசாரித்துக்கொண்டிருக்கின்ற்றனர்

அவ்விசாரனைகள் அதை
தொடர்ந்து ஒரு இரகசியமாக காப்பாற்றி வருகின்றன

ஒரு இரகசியத்தை காப்பாற்றுவது எப்படியென்று
அந்த இரகசியத்திற்கே தெரியாதபோது

அதற்க்கான சாட்சியங்களும்
அதை ஏளனம் செய்யக்கூடும்

சிலநேரம் உன்னைப் போன்று தான் நானுமென்று
அதென்னை அதட்டுவதுண்டு

அத்தருணங்களில்
விழாமல் நொறுங்குகிறது இரகசிய சாட்சியமொன்று

ஓசைகளற்ற உங்களது விழிகளின்
கேள்விகளுக்கான பதில்களுக்காக விழிமூடுகிறேன்

மூழ்கடிக்கப்பட்ட காகிதக் கப்பலைப் போன்று
ஈரம்பெற்றிருக்கிறதந்த இரகசியம்

ஓசைகளாலோ எழுத்துக்களாலோ
வெளிப்பெடுத்த முடிவதில்லை இவ்வகை இரகசியங்களை

எனது இரகசியத்தின் பட்டறையில்
அமர்திருக்கும் உங்களுக்கு

நான் சொல்ல நினைப்பதெல்லாம்
ஒரு இரகசியத்தை காப்பாற்றுவது எப்படி என்பதே
***
கலாசுரன்

  


No comments:

Post a Comment