Wednesday, May 1, 2013

ஒரு பொய்யான பெருமூச்சு.

*
ஒரு பொய்யான
பெருமூச்சை வழியனுப்பிவிட்டு
பயணிக்கிறோம்.

அப்பயணம்
எங்கே போகிறது என்றோ
எங்கு சென்றடையும் என்றோ
அறிந்துகொள்ள
முற்படாதிருக்கிறோம்.

அதீத கற்பனை ஒன்றின்
மரணத்துக்குப் பிறகு
அப்பெருமூச்சு
நம்மை நோக்கி
ஆவேசமாக வருகிறது.

எனது மந்திரங்களில்
தூங்கிக்கொண்டிருந்த நாய்க்குட்டிகள்
மண்ணில் புரண்டபடி
மார்பில் அடித்து அழுகின்றன.

அவற்றின் தாய்
நிலவைப் பார்த்து
சப்தமாகக் கூக்குரலிடுகிறது.

மிக அருகாமையில்
வந்துவிட்டது
அந்தப் பெருமூச்சு.

நடிக்கவேண்டியிருக்கிறது

தூங்குவதுபோன்று,
பயமே இல்லாதது போன்று,
சந்தோசமாக இருப்பது போன்று.

திரும்பிவரும்
ஒரு பொய்யான பெருமூச்சைப் பார்த்து
இன்னும் என்னவெல்லாமோ
செய்யவேண்டியிருக்கிறது...
***
கலாசுரன் 

No comments:

Post a Comment